بتفكر بعقلك ولا بقلبك ؟ أنا بفكر بنفسي !!
من أشهر الاسئلة اللي بتتسأل واللي فيها غالبا بتكون الاجابة ساذجة جدا ومكررة ومن نوعية : أنا بفكر بعقلي بس بحكم قلبي
جبتلكم النهاردة إجابة جديدة ومختلفة ويمكن أكتر واقعية وأهمية من العقل والقلب ! النفس
وعلشان تفهم يعني ايه الواحد بيفكر بنفسه فخليني أقول إن لو
التفكير العقلي هو تحليل للمعطيات والواقع الدنيوي والمصالح
والتفكير العاطفي هو وضع العاطفة والحب والشغف والمشاعر في المقدمة
فالتفكير النفسي هو عملية قياس وقع النتيجة على النفس حتى لو العقل والقلب رفضوا القرار !!
It’s getting better now
هقولك مثال : لو قولنا انك عايز تشتري عربية فلو هتختار
بالعقل : اختار عربية محركاتها قوية وقطع غيارها موجودة وفيها سرعة في إعادة البيع
بس لو اخترت بقلبك هتختار الشكل الحلو أو السبورتيف أو اللون الهافاني اللطيف
بس الاختيار النفسي هو انك هتحط نفسيتك وصراعاتك النفسية كمعيار . بمعنى : انت لو اخترت عربية هتختار عربية تحسسك بالفوقية مثلا ، تديك برستيج ويتعرف انها غالية علشان تحسسك طول الوقت بالتميز . حتى لو كان شكلها وحش وانت مش قابله (القلب) وحتى لو كان قطع غيارها غالية أو مش موجودة (العقل)
بمعنى آخر ، سيبك من انت واعيا عايز ايه ! فكر في (ايه اللي انت تعرفه عن نفسك) وتجنب اضطرابات أو توافق مع اضطرابات وميول نفسية وليس عاطفية
فالاختيار النفسي هو الاختيار اللي هيخليك تُرضي لاشعورك مش عاطفتك ولا قلبك
هل ده شىء جديد والمفروض نستغرب هو نهاد رجب ازاي يقول كده ؟ لا أبدا ! ليه بقى ؟ لان ده اللي بيحصل حتى لو انت مش واخد بالك
عمرك حسيت انك ندمان على اختيار اخترته ومش عاجب عقلك ولا قلبك ؟
وسألت نفسك أنا ازاي اعمل في نفسي كده ؟ ده ببساطة لان الاختيار ده في اللحظة ديه هو اختيار اللاشعور واللي بيعبر عن أعمق صراعاتك المكبوتة واللي هتغير عن نفسها عن طريق اختيار شريك حياة سام ومؤذي أو حتى وظيفة في الحياة بتستنزفك ..
وهنا هسيبك مع الفكرة ديه تتأمل فيها وهنهي بسؤال تسأله لنفسك
احنا مش بنختار افضل اختيار طبقا لمواردنا في الماضي (مع احترامي للبرمجة اللغوية العصبية)
احنا بنختار اختيار بيعبر عن مكنونات لاشعورية ماتحلتش في وقتها وبالمناسبة (بيكون عندنا قدرة اننا نختار اختيار افضل بس مبنرضاش)
السؤال بقى ، فكر في اختياراتك ودور فيهم على اختيار رافضه عقلك وقلبك ومع ذلك انت نفذته واسأل نفسك “ازاي الاختيار ده كان بيعبر عن حاجة مكتومة جوايا مقدرتش أواجهها في نفسي) ونصيحة ليك اقرا المقال تاني وأفهمه كويس واسال نفسك السؤال وهتتفاجىء !
ويومكم أجمل من يومي
نهاد رجب
ابدأ رحلتك لفهم جذور مشاكلك النفسية واكتشاف أدوات عملية تعزز وعيك وتطورك.
احجز مكانك الآن
